وحياه ربنا كده عيب
قالو الست فى دهشور من يومين باست ايد نائبه رئبس الوزراء ماشى عدينا دى وسكتنا لكن ان اللى ما يتسكتش عليه ان الوزيره بتاعتنا السيده فايزه ابو النجا بتقول ان دا عادى جدا وان تقبيل الايد دا على سبيل الترحيب ليس اكتر يمكن ما تعرفش ان بروتوكول تقبيل الايد للترحيب دا مش فى مصر وان لما واحده غلبانه تبوس ايد واحده نائبه فدا على سبيل المذله والشحاته ليس اكترودا بدال ما يشوفو ليه الست الغلبانه عملت كده وكام المبلغ اللى فرحها ل احنا كده نفضل نبرر التصرفات الغلط مش نصلحها!!!!!
وكمان التصريحات بتقول ان كان فيه مسؤولين وناس من جهات مختلفه مع ان اول ما اتنشرت الاخبار قالت ان ما كانش مع النائبه الا الوفد اللى جاى معاها وكمان كان فيه تواجد اعلامى اسبانى ضخم ..طبعا علشان يصور الفضيحه بالكامل.والتصريحات دى تصريحات الوزيره فايزة ابو النجا جات بعد يومين من نشر الاخبار دى...... يمكن كانت بتدور على مبرر وبيتهلى فعلا لقته .........
كفايه مذله بئى ولا ايييييييييه!!!!!!!!!

شمو النسيم براحتكم بس..........
كل سنه والاخوه المسيحين بخير شم النسيم دا عيد جميل ومحبوب وكل حاجه بس مش بتاعنا يعنى مش عيد مشترك لكل الشعب زى تحرير سينا مثلا وانما دا عيد خاص للاخوه المسيحين فهو عيد خاص بيهم زى ما احنا المسلمين لينا اعياد خاصه بينا فليه نشاركهم ونزاحمهم وكل الدنيا تبئى زحمه والجناين وكل حته يعنى لا هما هيعرفو يحتفلو ولا احنا هنعرف نخرج من بيوتنا زى ما حصل النهارده انا من كتر الزحمه رجعت البيت تانى.
فيا مسلمين مش من قله الاعياد يعنى ولا احنا عايزين اى عيد ونشبع فيه فسح.......

يوم الشهيد
تم تخصيص يوم 17 ابريل يوم للشهيد دعوة لجميع اصحاب المدونات للمشاركه فى هذا اليوم ولو بكلمه تخفف عن هذه الشعوب اللتى تعانى بعض من الامهم وان يكون يوم 17 يوم للحداد العالمى لجميع ارواح الشهداء وندعو بالنصر لجميع هذه الشعوب
ويارب يكرمهم ويجمعنا بهم فى جنته انشاء الله
وربنا يحفظ من وجهلى الدعوة للمشاركه فى هذا اليوم وهو فعلا مثال للوطنيه وليد الاسلام صاحب مدونه الاسلام حياتىhttp://elislamhayatey.blogspot.com/

تعديل وزارى ايه ونيله ايه
قريتلك خير اللهم اجعله خير قال ايه هيعملو تغير وزارى لامتصاص الغضب الشعبى قال يعنى اللى هيجوا احسن من اللى راحوا وحياه ربنا لو جابوا الامم المتحده كلها هنا وعملولها مقر دائم علشان تحل مشاكلنا مش هتقدر تعمل حاجه
اللى احنا فيه دا مش نتيجه يوم ولا اتنين دا نتيجه سنين من الفساد أدامها كتير علشان تتحل وبيتهيئلى ان مش التغير الوزارى هو اللى هيحلها لازم حاجه تانيه هى اللى تتغير ولا انتوا مش معايا!!!!!!!
طيب شوفوا ف المحيط قايلين ايه بيقولوا ان أحمد ماهر، منسق حركة6 ابريل:" قال إنه تلقى رسالة على تليفونه المحمول من ضابط أمن دولة بيهدده بالاعتقال يوم الإضراب إذا حاول تحفيز عمال كفر الشيخ والمحلة على المشاركة"، وكمان قال " أن الضابط طالبه فى الرسالة نفسها بالجلوس فى منزله، وعدم الظهور فى الأماكن العامة لفترة طويلة".
فواضح جدا انهم بيمتصو غضب الشعب ومش عايزين يزعلوه فى حاجه.........
والله ربنا يستر على البلد دى.

فتاه لها ماضى

سالته هل تذكر حبيبى الماضى؟

قال لا فأنا بحبك سعيد وراض

قالت هل ستدكرنى يوما به؟

اجاب لا فماضيك ايضا اصبح من الماضى

ممكن؟ ممكن حد يعمل كده زى اللى موجود ف الشعر يعنى دول اتنين كل واحد منهم كان ليه ماضى هو مش فاكر ماضيه علشان خلاص لقى السعاده معاها .وحتى لما هى سالته هيفكرها بماضيها قالها لا كمان ولا حتى دا هنفتكره وهنرميه ورا ضهرنا لان دا ماضى خلاص راح لحاله...........
فيه بئى نوع من الناس ماتحبش ترتبط بواحده كان ليها ماضى قبل كده ممكن يكون ليه حق لان هيحس انا مش هتنسى يعنى ممكن يجى عليها وقت وتفتكر الفتره دى من حياتها وتفكر فى اللى كانت مرتبطه بيه ودا فى رأيى بمثابه خيانه ان هى تفكر مجرد تفكير فى حد وهى مع حد تانى.
بس كمان اشمعنى الراجل يفضل يتباهى بماضيه وبطولاته النسائيه ويفضل يعمل روميو وانا عرفت فلانه وحبيت فلانه وعادى خالص انما لو هى عملت كده يئولها مع السلامه....... طبعا مش كل الناس بتفكر كده.
اساسا الماضى دا نوعين الاول ان اتنين عرفوا بعض مده صغيره بس ما اتفقوش وخلاص كل واحد راح لحاله يعنى محدش فيهم هيفتكر التانى بعد كده لانهم اساسا ماينفعوش لبعض طالما ما اتفقوش وتقريبا دا اشطه وأوك انك تحب واحده ماضيها بالشكل دا.
انما الماضى التانى اللى يخوف ان يكون ليها قصه حب كانت قصه جامده والظروف هى اللى فرقتهم فدى الخوف منها لان ممكن تحن للقديم
........بس فيه ناس ومنهم انا بتئول ان الماضى دا ملك للشخص لوحده والحاضر بئى هو اللى ملك للاتنين من اللوقت اللى عرفو بعض فيه ويبدأوا من وقتها يحاسبو بعض على كل كبيره وصغيره انما الماضى دا عدى وفات وراح لحاله فبلاش نرجعه ونصحيه مره تانيه .....ولا اييييه؟
وعلى رأى عمرو دياب مبلاش نتكلم ف الماضى