انجازات الباشا الريس

كتيب طويل عريض لانجازات السيد المحترم احمد نظيف وحكومته وتعددت هذه الانجازات من طرق وكبارى وتعديلات دستوريه وقانون مرور وشنطه اسعافات وخوذه وحزام . مهو دا فعلا اللى كان ناقصنا احنا مش ناقصنا حاجه الا الكبارى والحاجات دى كتر خيرهم والله

وبالاضافه لكل الانجازات العظيمه طبعا كنا كل يوم بنسمع شويه تصريحات اعظم انا افتكر منها شويه مثلا

_مصر دوله علمانيه دا طبعا فى نظر سعاده رئيس الوزرا

_ الشعب المصرى غير ناضج سياسيا وان عليه ان ينضج قبل اقامه نظام ديموقراطى كامل مثل الموجود فى الولايات المتحده .....يعنى لما نكبر شويه هيديلنا شويه ديموقراطيه

_المعارضه فى مصر كان من الممكن ان ترتفع نسبتها الى 40% اذا لم يكن هناك تدخل حكومى ف الانتخابات .......اهو الراجل اهه اعترف لوحده هو اللى بيكتم انفاس المعارضه والله بارك الله فيك

_وتصريح كمان فظيع لا مرعب آل ايه بقى :المكالمات كلها تراقب وتسجل واللى يخاف ما يتكلمش يعنى اوعى تقول لحد سر ف التليفون .والله فكرنى بفيلم اللى بالى بالك لما رياض باشا قال لللمبى هتلاقينى ناططلك فى زنزانتك ف بنطلونك اهو انت هتلاقى نظيف ناططلك فى سماعتك فى تليفونك

_وحاجات تانيه كتير شبه دى كل يوم بيطلع علينا بيها رئيس الوزرا واتباعه قصدى وزرائه

اقولكو حاجه انا مش هتكلم كتير هما كلمتين على راى ايهاب توفيق

اليكم بعض الابيات من الشعر .ما ينفعش ان عيد الحكومه يعدى من غير ما نقول قصيده فى حكومتنا الجميله .

الابيات تقول:

5 سنين آل ايه انجـــــــــــــــاز** خلاص البلد دى جابت جاز

و ف الاخر طالعلى بكتاب كبير** أل ايه يا عينى عمل اعجاز

لا شاب لاقى يكون نفســـــــــه** ولا بت عارفه تجيب جهاز

ويبتفرجلى على كــــــــل دول** رجل على رجل فوق كرسى هزاز

متمخمخ ومتكيف ع الاخـــــر** وبيقول اللى بيته من قزاز

الناس فاسده علشان كــــــــدا** انا قاعدلكم وكله يتغاظ

حقك يا عم دا انت مشرفنـــا***ل2050 وهنشوف خبايا

مش كفايه حريق بــــــــيوت** غرق عباره وذنوب ضحايا

ميه مجارى البرادعه ماتــت **سلمت امرها ورفعت الرايا

لو شفت ابليس هتحس انــك** تمام كأنك باصص فى مرايا

بحب بلدى بس فــــــــــــين **بلدى يا ناس دوروا معايا

مفيش كلام عندى اقولــــــه** وصلنا خلاص للنهايه

يارب تكون نهايه كل ظالم **والبلد تنضف ياريت كفايه

بس خلاص..........

والله الراجل دا هيخلينا نبقى شعراء أهو انجاز برده ولا اييييييييه.

وقت المصريين

اكيد كلنا واحنا ماشيين بنسمع حوار زى دا مثلا واحد بيتكلم ف التليفون ايوة انا ساعه واكون عندك او واحد تانى بيقول انا ف التاكسى اهه ادامى دقيقتين واوصل واساسا لا الاولانى اتحرك من مكانه ولسه مستنى الاتوبيس ولا التانى راكب تاكسى دا فى ميكروباص وأدامه ساعتين مش دقيقتين

هو احنا كدا مش بنحترم المواعيد الوقت عندنا لا قيمه له

لا وايه فيه ناس بتبئى مبسوطه لما تضيع وقت غيرها يعنى لما مثلا اروح اسحب ورق من الجامعه وموظفه شؤن الطلبه تفضل تكلم صاحبتها شويه وتاكل الساندويتش شويه (اصلها ما اخدتش فطارها وهيا جايه)ونستنى الهانم تخلص يروح الصراف يمشى وانا اضطر اجى يوم تانى بسبب المدام الرغايه اللى ما اخدتش فطارها وف الاخر ضاع وقتى ع الفاضى

ولا لما نكون ف رحله وسواق الباص يجرى علشان يوصل بدرى ربع ساعه يرتاح فيها شويه ومش مشكله جدول المواعيد والناس اللى المفروض جايين بلدنا سياحه علشان يشوفو حضارتنا يشوفوا مع الحضاره شويه تخللف وعدم نظام

احنا ممكن بسهوله نحافظ على وقتنا ازاااااااااى

-شويه نظام والتزام التزم مع الناس هتلتزم معاك يعنى لما تكون انت بتيجى ف الميعاد انا هتكسف اتأخر عليك

-انجز الحاجه فى وقتها ولا تؤجل عمل اليوم الى الغد علشان ما يتراكمش عليك الشغل وتهرب منه

-نربى ولادنا على القيم الكويسه ويمكن اللى ما قدرناش نوصله احنا يوصلو اولادنا ونعلمهم ينظمو الوقت ويعملو كمان جدول للمذاكرة

- الصلاه فى وقتها ربنا امرنا باحترام الوقت بدليل الصلاه لازم تكون ف ميعادها والا هنتعاقب

وتبقى كلمه....................

شهر رمضان قرب هنظم وقتنا للصلاة والقران والعباده يارب تكون بدايه ياااااااااارب كل الناس تحترم وقت بعض انا بعانى لما اكون ف ميعاد واستنى واسوأ حاجه ف الدنيا الانتظااااااااااار .

وزى ما قال الامام على رضى الله عنه" ما نقصت ساعه من دهرك الا بقطعه من عمرك"