وبالاضافه لكل الانجازات العظيمه طبعا كنا كل يوم بنسمع شويه تصريحات اعظم انا افتكر منها شويه مثلا
_مصر دوله علمانيه دا طبعا فى نظر سعاده رئيس الوزرا
_ الشعب المصرى غير ناضج سياسيا وان عليه ان ينضج قبل اقامه نظام ديموقراطى كامل مثل الموجود فى الولايات المتحده .....يعنى لما نكبر شويه هيديلنا شويه ديموقراطيه
_المعارضه فى مصر كان من الممكن ان ترتفع نسبتها الى 40% اذا لم يكن هناك تدخل حكومى ف الانتخابات .......اهو الراجل اهه اعترف لوحده هو اللى بيكتم انفاس المعارضه والله بارك الله فيك
_وتصريح كمان فظيع لا مرعب آل ايه بقى :المكالمات كلها تراقب وتسجل واللى يخاف ما يتكلمش يعنى اوعى تقول لحد سر ف التليفون .والله فكرنى بفيلم اللى بالى بالك لما رياض باشا قال لللمبى هتلاقينى ناططلك فى زنزانتك ف بنطلونك اهو انت هتلاقى نظيف ناططلك فى سماعتك فى تليفونك
_وحاجات تانيه كتير شبه دى كل يوم بيطلع علينا بيها رئيس الوزرا واتباعه قصدى وزرائه
اقولكو حاجه انا مش هتكلم كتير هما كلمتين على راى ايهاب توفيق
اليكم بعض الابيات من الشعر .ما ينفعش ان عيد الحكومه يعدى من غير ما نقول قصيده فى حكومتنا الجميله .
الابيات تقول:
5 سنين آل ايه انجـــــــــــــــاز** خلاص البلد دى جابت جاز
و ف الاخر طالعلى بكتاب كبير** أل ايه يا عينى عمل اعجاز
لا شاب لاقى يكون نفســـــــــه** ولا بت عارفه تجيب جهاز
ويبتفرجلى على كــــــــل دول** رجل على رجل فوق كرسى هزاز
متمخمخ ومتكيف ع الاخـــــر** وبيقول اللى بيته من قزاز
الناس فاسده علشان كــــــــدا** انا قاعدلكم وكله يتغاظ
حقك يا عم دا انت مشرفنـــا***ل2050 وهنشوف خبايا
مش كفايه حريق بــــــــيوت** غرق عباره وذنوب ضحايا
ميه مجارى البرادعه ماتــت **سلمت امرها ورفعت الرايا
لو شفت ابليس هتحس انــك** تمام كأنك باصص فى مرايا
بحب بلدى بس فــــــــــــين **بلدى يا ناس دوروا معايا
مفيش كلام عندى اقولــــــه** وصلنا خلاص للنهايه
يارب تكون نهايه كل ظالم **والبلد تنضف ياريت كفايه
بس خلاص..........
والله الراجل دا هيخلينا نبقى شعراء أهو انجاز برده ولا اييييييييه.
هناك 5 تعليقات:
والله انت كدا لخصتى اوجزتى فانجزنى
يا حكومه ارحموا من فى الارض يرحمكم من فى السماء
يا شوشو براحه شويه انتى ساخره لازعه اوى كلام جميل حبنا لمصر بس الحب مش كلام بس تعرفىى احنا من سنة 2000 بنشتكى كل الوزراء اللى مسكوا البلد كلهم مش نافعين و الوزراء دول جايين من الشعب يعنى الشعب فعلا مينفعش فهمانى ثقافة الشعب واخلاقه ومبادئه لازم تتغير علشان يخرج من وسط الشعب وزير يكون على مبادئ و اخلاق وقدره على تخطى العقبات ففعلا العيب فينا احنا كشعب انا مثلا بحب مصر جدا بكره لو بقيت وزير ممكن الفلوس تغرينى واسرق ممكن اعين واحد قريبى مأثر عليا فى مكان حساس احنا منعرفش هنكون ازاى لو تعرضنا للفتن وانتى شايفه ان حال الشعب نافع انتى مش كنتى لسه بتتريقى على الشاب ابو جيل والحزام بيعافر علشان يرفع البنطلون الشاب ده هل قادر فعلا على اتخاذ قرار يفيد مصلحة البلد و ياترى ايه مشكله غير الجل و الحفلات كلنا سيئون وكلنا مذنبون وحين نلوم فلنلوم انفسنا اولا نلوم المدرس الذى يتاجر بالتعليم ونلوم الدكتور الذى يتاجر بالطب ونلوم الموظف المرتشى لأنها دائره كامله متكامله
احمد مصطفى
http://amiraladb.maktoobblog.com/
فعلا يا احمد لا زم التغير يكون مننا احنا واذا صلحت الرعيه صلح الراعى
"وان الله لا يغير ما بقوم حتى يغيروا ما بأنفسهم"
وعلشان نتغير يبقى نصلح من حالنا شويه وما نرميش اللوم على حد بس بالاضافه لدا لازم كمان يكون فيه عوامل تساعدنا على التغير ولازم تكون الحكومه هيا اول حد يمد ايده لمساعدتنا مش تلاقي الدنا متنيله تروح تنيلها علينا اكتر هنلاقيها منين ولا منين
i have read this report and i really like it so much coz it simply incarnates what lies in the Egyptian society and ur report is not so acute as Ahmed says but it tells the truth of the corruption we live in and u simply expressed what millions feel in this country
طبعا عندك حق فى الكلام ده المشكله مش فى النظام المشكله فى الاداره احمد نظيف لما كان ماسك الاتصالات كا ن ناجح فيها جداابس رئيس الوزراه كبيره عليه وسعت منه لوكل واحد مسئول بس عمل اللى عليه بضمير هنبقى بلد كويسه وكفايه سرقه وضحك علينا
إرسال تعليق