ممكن تحب بنت مسترجله

المشكله دى كانت محيرانى ونفسى اسأل بجد ممكن تحب بنت مسترجله وازاى هتتعامل معاها هتحس ان هى حبيبتك ولا هتحس انها زى اخوك او صاحبك رحت بئى عملت بحث صغير كده وسألت كذا حد ولميت ولاد الجيران برضه وسألتهم وكانت النتيجه كالتاتى :
اول حد ناصر معهد هندسه قالى انا مش ممكن ارتبط او احب بنت بالشكل ده لانى مش هبئى عارف بتعامل مع مين اعاملها معامله راجل لراجل ولا احبها اكيد هيكون صعب.
محمد عثمان بئى كان ليه راى تانى :بيئول ان البنت اللى شخصيتها كده دى هتكون جدعه وتفوت ف الحديد وما يتخافش عليها وانا هكون مبسوط معاها ومطمن عليها.
مصطفى بئى اصغر مرتبط عرفته عنده 14 سنه بس ليه راى مميزبيئول انا احبها مسترجله مع الناس وحاجه تانيه معايا
والله عندك حق يا صاصا المفروض ده اللى يحصل.
اما رشا فقالت انا مبحبش البنات دى علشان عايشين الدور ويفضلوا يكلموا الولاد كده بطريقه انا بعتبرها بجحه لدرجه ان الهزار يمكن يوصل للضرب ده انا مره شفت واحده بتضرب واحد بالبونيه والشلوت والله مش بهزر حاجه تكسف.
شلوووت لا العمليه كبيره اوى وما يتسكتش عليها ايه اللى بيحصل ده لالالا كده مش حلو البنات جرالها ايه يا جدعان عليه العوض ومنه العوض فى بنات مصر شلوت يا حول الله يارب
بصراحه no comment انا هسيبكم انتو اللى تعلقوا.